新泰東南亞餐廳

Open Now

Now Closed

老實講，我真係好鍾意食泰國菜㗎，尤其是今日專登喺尖沙咀附近搵食，其實附近都有好多好好食嘅泰國菜，今次就嚟咗呢一間比較多好平嘅新泰東南亞餐廳。一入到去門口，就已經發覺裝修好有泰國feel，有一架篤篤喺門口，真係好似去咗泰國啊!餐廳裏面啲座位都好寬鬆，都坐得好舒服，星期一夜晚食晚餐都幾爆下，建議提前book位。見到個餐牌發覺好多嘢都好想食，但係泰國嘢都好大碟，所以就揀今日最想食嘅幾個餸同大家分享吓。第一個係馬拉盞炒通菜，我諗好多鍾意食泰國嘢嘅人都係必點之一，啲馬拉盞都幾夠啦，啲通菜都好新鮮，分量都係算正常，兩個人食都食得晒。跟住呢個真係重點推介啦，係椰青沙冰啊，唔係到到都有得飲，好似係呢間餐廳嘅出名餐飲之一，我發覺裏面嘅椰青味都好足夠融晒入去啲沙冰裏面，鍾意食椰青嘅朋友一定要點啊。然後就到個麵包焗咖喱軟殼蟹，啲麵包焗得幾鬆脆，啲軟殼蟹都好好食，個咖喱唔算太辣，如果怕辣嘅朋友都可以點㗎。最後就係呢一個越式燒春雞釀香茅黃飯，嘩呢個真係喜出望外啊，隻燒春雞好大好香，重點係裏面啲香茅黃飯，嘩真係好好食配合埋個汁，簡直係天衣無縫，我覺得呢一個雞真係要食，都見到在場好多人都有點。