水門雞飯 (萬勤商業大廈)

Open Now

Now Closed

今天公司清假難得約到尖沙咀返工嘅朋友食飯，平時甚少來該區食中午，一時間想唔到食乜好，朋友就話食開依間介紹我試試。十二點前來到仲未開門已見十多人排隊，街道狹窄人流多，排隊都有點阻礙途人排得唔自在，幸好排了一陣十二點準時開門。餐牌上選擇唔算多，有午市套餐供應，套餐包湯和飲品，價錢唔貴在該區而言相當抵食。而且難得食到咁正宗泰式地道風味，CP值甚高，難怪十二點入座後好快已滿座。雞骨湯好似飲緊胡椒豬肚湯，湯裡頭剩係放了片冬瓜，飲落好重胡椒味可以驅寒醒胃，天氣凍飲就好正，湯味道唔咸清清地無乜油，唔錯唔錯。水門雞飯(轉雞脾) $72招牌菜一定要食，朋友識食補多十蚊轉做雞脾，夾左佢兩件雞食又真係幾好味。雞肉起左骨食落啖啖肉，雞皮薄無乜脂肪，肉質嫩滑細緻有雞味。雞油飯份量唔多可要求加飯，飯粒粒分明口感煙韌，但略為乾身油香味無咁濃，食落清清地無乜油膩感，食都食得健康！泰式豬手飯 $62豬手我至愛，皮肉都好入味好軟身，而且食落唔係好油膩，又係無骨啖啖肉相當好味，同樣都係配雞油飯，幾有水準。泰式奶茶 +$5有二十多款選擇，當中以泰式奶茶比較突出，有紅茶香味飲落幾滑，味道濃少少偏甜幾好飲。