8鍋臭臭鍋 (金巴利道) (Closed)

天氣一凍，唔知點解就會自動諗起火鍋。話說大學時期曾經喺台灣住過一個冬天，而當年宿舍樓下有好幾間臭臭鍋變成左一班朋友晚飯既食堂，所以不期然就會想去食返當年既果種味道。好彩香港都有得食，前晚放工黎到都等左幾張枱就到，我地兩個人叫左台式麻辣同招牌臭臭鍋。臭臭鍋其實臭主要因為臭豆腐，所以接受到既就會好似我咁好鍾意。不過今次我就叫左麻辣鍋試試，入面勁足料，有見慣既豬大腸、丸、金菇、娃娃菜、牛肉（臭臭鍋係豬肉）⋯不能盡錄，仲有非常地道既泡面（王子麵！），以前喺台灣食一定會叫（另外可加飯/粉絲），另外當然唔少得豬血、米血糕同台式魚餃&凍豆腐，仲有估唔到會有沙白！成個鍋都非常好食，而且呢個份量絕對物有所值！麻辣湯底好鮮，當然仲有麻辣既香味，唔會死辣，有返到台灣食既感覺，而且料都好新鮮，牛肉好爽滑，蔬菜類都好清甜，食完成個人暖笠笠！絕對會再黎食。