河內大娘越南餐廳 (Closed)

尖東麼地道巴士對面有間越南菜小店，原來有唔少人都同我地一樣，都咁識食，識得搵到嚟呢度。門口擺放左餐牌好清晰，價錢都幾貼地，餐廳掛起左好多手繪越南草帽，別有一番越南風味。大熱天時，即刻叫左兩杯冰涼飲品解渴。蓮子龍眼冰清甜潤喉又養生，蓮子甜茲茲，龍眼肉飽滿。珍多冰椰奶香濃，綠色粉條口感有點像啫喱，配埋綠豆蓉令整杯飲品口感更豐富，挺喜歡的！香茅煮大蜆用大鐵碗盛載，蜆的品種是沙白，比一般蜆仔大隻啲同厚肉啲，富海水鮮味，用香茅煮嘅湯底清新又鮮甜，成碗湯都飲得，好味到我地飲哂成碗！小食拼盆有4款小食，分別係蒸粉包、炸春卷、炸雞翼同埋炸蝦餅。蒸粉包有木耳絲同其他蔬菜絲，味道較清新，炸春卷外面炸得十分脆口，同越南食過的非常相似，炸雞翼好香口，炸蝦餅彈牙，點少許甜酸醬食更惹味。鮮茄蟹肉湯檬的蕃茄湯底超級濃郁，惹味開胃，有蟹肉、鮮蝦等海鮮令碗檬粉更鮮甜，另外有扎肉、肉丸等配料，整碗湯檬感覺好足料，食完有好滿足嘅感覺。這小店的越南菜相當地道，味道亦非常正宗，味覺彷如置身越南河內之中。