川館 (大王東街)

Open Now

Now Closed

放工同同事去東大街影聖誕裝飾，踏入12月終於凍返啲，想食啲辣辣地嘅嘢暖下胃，近排我愛上咗食酸菜魚，之前喺屋企樓下食咗幾間茶餐廳嘅酸菜魚，都覺得味道麻麻，同事介紹我嚟呢間，雖然係小店但人流不斷，正宗川菜價錢合理，一於試吓。一開始當然要點我最愛嘅酸菜魚啦，好大鍋，一上枱已經聞到好香，啲魚好滑，份量夠晒2人食，酸酸辣辣非常開胃，鍋入面有大量配菜同埋冬粉，個湯實在太好味我哋做嗌咗個白飯，用黎湯撈飯，味道非常正宗，啱晒我呢啲重口味人士，簡直回味無窮，超正！蔥爆牛肉用嚟送飯又係正，牛肉好鮮嫩，而且份量好多，一碟勁多舊牛肉都係幾十蚊，抵。螞蟻上樹即係炒粉絲，炒粉絲好難炒得好乾身，呢間嘅螞蟻上樹食入口唔會好油，而且好乾身好夠味，辣辣地真係食得好過癮。炒椰菜花我只係叫咗小辣，但配埋鹹肉一齊食，味道濃郁又唔會太辣，食中菜點都食啲菜成餐飯都好似健康啲咁，間中食吓辣飲下啤酒，開心迎接終於都開始凍嘅12月。