韓米Miso (啟田市場) (Closed)

今日要去藍田交收，竟然比我發現咗藍田街市附近有好多食肆。我咁啱又想食韓國菜，所以見到韓米就買咗兩個便當。店舖所有食品都係手作，每日用新鮮材料，新鮮即製，買唔晒都會掉。店舖入邊仲會有正宗韓國大廚坐鎮，包保韓式食品正宗。飯卷比較搶手，通常夜晚八點就會賣晒！韓式粉絲便當便當總共會有四隔，有韓式粉絲、韓式年糕、炸物同酸蘿蔔。粉絲嘅份量好多，質地粗身，食落煙煙韌韌。裏面有唔少配料，有蘿蔔絲、韭菜、木耳、蛋、豬肉，口感豐富。辣炒年糕裏面仲有幾塊魚糕，年糕夠煙韌，每滿年糕都會沾滿韓式辣醬，非常惹味！炸物有炸蝦同炸紫菜卷，兩個都係即叫即炸，所以非常脆，好味～牛肉便當牛肉便當一樣有四格，有牛肉、飯、炸物同酸蘿蔔。牛肉係即叫即炒，我見到店員係個鐵板到炒，熱辣辣。味道甜甜地，有好多牛肉之外，仲有椰菜、洋蔥絲紅蘿蔔絲。上返牛肉亦都好多汁，可以撈飯食！炸蝦、炸紫菜卷一樣香脆，原來炸紫菜卷入邊係韓式粉絲，口感幾得意。酸蘿蔔非常之爽，可以解膩。韓米嘅價錢唔貴，份量又多，下次想試吓佢哋嘅飯卷！