順德聯誼總會

Open Now

Now Closed

順德拆魚羹做得好好，有魚香無魚鯹，當然亦無魚骨啦，佢D蔥吊起咗D魚肉嘅鮮味。翡翠海皇酥拼蝦醬骨就覺得比較一般D，翡翠海皇酥好大舊有少少飽肚，蝦醬骨就無乜蝦醬味。煎焗魚咀真係比魚咀你而唔係成個魚頭就咁上，欣賞佢夠講究，另外個咬開個面就見到師傅真功夫，入面好鮮嫩。子薑麵醬蒸魚雲新鮮好味，個子薑麵醬用黎配個魚雲真係好夾。梅子香芋碌鵝嘅鵝就肥咗少少，不過佢個梅子汁做得好好，令到呢個餸好開胃又唔會滯，最好食係下面墊底的芋頭，吸晒梅子汁同埋D鵝油，超好食，係成個餸嘅精髓所在。脆皮釀鯪魚真係一門功夫菜，呢度嘅師傅做得好好，由個樣到入面釀嘅加咗蝦米嘅鯪魚肉都好掂，不過記住要點佢個辣椒豉油，點咗真係會好食好多。玻璃皮乳鴿蝦子柚皮又係做得好好食，佢用咗柚青去做，清香得黎又無咁滯。自家製魚腐浸勝瓜個自家製魚腐好香蛋味，勝瓜去皮夠晒嫩。順德月婆炒飯炒得夠乾身，有鑊氣。蛋白杏仁茶做得好香，又唔會太甜，幾好。