亞蘇爾 (新城市廣場) (Closed)

係香港想食澳門葡式野，亞蘇爾係其中一個最好嘅選擇。未洗入到舖頭就已經有幾款口味嘅葡撻選擇，上次經過試過葡撻，今次入去坐低試下佢其他嘅葡菜～～我地叫咗三樣野，以下一一講返，但我呢度想講嘅係佢地上餐嘅速度奇快，令到食客好快就享受到滿枱嘅美食第一樣係葡式辣肉腸炒雜菜，通常係大排檔食飯先會嚐到鑊氣，但今次係呢間葡式餐廳都食到咁有鑊氣嘅餸菜，而且味道都係滿分。第二樣就係十月初五蝦籽松露意大利麵，麵嘅面頭舖滿蝦籽，松露就作為中間嘅一點點綴。拌好後蝦籽嘅味道十足，而松露就令味道更加豐富，加上一撮惹味嘅煙肉粒粒，食落好味又不會太油膩。第三樣主菜就係椰香葡國雞配蒜蓉包，腸落細細盤嘅葡國雞入面都好多件雞，仲有薯仔粒粒，沾上葡汁食落去香味充滿口腔而蒜蓉包就推薦邊食邊點汁，每一啖都有汁先係最好味嘅食法，又唔會浪費咗啲醬汁。最後我地仲叫咗一個甜品—宇治抹茶黑木糠布甸，黑木糠係朱古力味，呢個配搭幾有趣。整體來講，呢間餐廳嘅裝修、食物同服務都值得推薦，想係香港食澳門菜，呢度絕對係其中一個選擇！