青藏牛肉麵 (Closed)

之前同男朋友去咗北角行街街，諗住搵下啲唔同啲嘅米線食。我地見都冇乜食過青藏菜 ，就決定試下呢間餐廳！雖然間餐廳叫做青藏牛肉麵，但係佢都有提供羊肉麵嘅。話說我同男朋友都鍾意食羊肉，所以search到呢間嘢有羊肉食嘅時候簡直雙眼發光！睇完menu，我地梗係嗌兩碗羊肉麵嚟食啦！麵類係有得揀扁麵同拉麵嘅我同男朋友都揀咗扁麵因為比較鍾意食啲粗啲嘅麵條。碗麵一嚟到，不得了！上面超多芫茜！鍾意食嘅朋友一定會好興奮！唔食嘅朋友記得落單嘅時候就要講走芫茜啦。羊肉都算淋， 啲麵都唔會煮到爛溶溶，都幾有咬勁架！ 湯底方面係比較偏清淡嘅，食開重口味嘅朋友可能就唔太適合。 不過性價比真係幾高下。我地仲叫咗兩個小食，分別係青藏串燒翠玉瓜同埋青藏蒜蓉燒茄子。茄子一嚟到，我哋都非常滿意！茄子上面鋪滿好多蒜蓉，而且仲有少少孜然粉，超級惹味。 串燒翠玉瓜都幾出色， 上面亦都係用孜然粉嚟調味。 燒得啱啱好，唔會太乾，咬落去仲有啲噴汁添! 呢餐食到肚腩都飛哂出嚟！滿足！