Farmer's Cooking (Closed)

今日同事話要食得清清地（因為要減肥喎！😂）係太古坊附近有一間小小食店，主要提供有機及用本地新鮮材料準備的午餐，主張清淡，自然，少調味，少油，可以話太古坊云云食肆的清泉😆 啱晒一眾呢頭出沒的靚女OL！我之前食過一次唔錯，今次再黎食！我嗌左：藜麥牛油果本地豬肉碎配麥米蔬菜飯碗。 呢間小店仲提供自家煲的時令飲品同湯品，可以無限添飲，今次係薏米紅豆水同埋魚翅瓜甘旬湯。係等待的期間，我都朋友都有飲。尤其是紅豆水，對女士去水腫一流！主菜到了！ 呢碗飯上面有半隻牛油果，揀牛油果要好有學問，一係太生，一係太熟淋淋爛爛都唔好食！呢隻就啱啱好，輕輕用匙羹就括到軟身的牛油果肉，入口軟滑即溶，我決定起晒肉用佢黎撈飯！碗飯仲有多種蔬菜，秋葵，切碎左的爽脆紫椰菜，椰菜花等等，仲有藜麥，同埋略略調過味的豬肉碎。 豬肉碎無肥膏，啖啖肉，配埋新鮮蔬菜，同撈左入飯的牛油果，每啖飯都口感同味覺十足！食得咁健康最怕唔飽肚，但呢度係食完好滿足，仲有種清新無油膩負擔的感覺！ 下次想食得清清地會再去！