鶴崎居酒屋 (Closed)

呢日下晝去咗觀塘開會，搞掂都已經成五點幾。我同同事趁早收就想搵間餐廳食個早飯，小酎一杯。我哋喺宏利金融中心見到「鶴崎居酒屋」門面幾靚🏮，就決定試吓。居酒屋面積大，座位寬敞，而且類似卡位嘅雅座更可落下布簾，變身成為小包廂，私隱度高。環境舒服自然令人食慾大增😉。餐廳採用QR code落單📱，但同時亦提供大大本實體餐牌以作參考，當中圖文並茂，令食客能掌握菜式內容。題外話，食物圖片同實物係一模一樣㗎，冇呃人👍。網燒安格斯牛扒($138)，🥩牛扒好鬼正，不比扒房嘅出品遜色。上碟時牛扒經已切件，但都隱約見到足兩塊，而且更有一定厚度添。牛扒本身質素都唔錯，肉味濃郁，肉質唔韌，配合埋非常惹味嘅燒汁一齊食🤤，再加上芝麻粒，冇得輸啊！京蔥雞肉稻庭烏冬($88)，🍜烏冬好大碗，無論麵條定餸料都份量十足。湯底熱辣辣，清清哋得嚟又夠入味；稻庭烏冬呈扁狀，口感幾彈牙。餸料方面幾豐富，包括有雞肉、大蔥、魚板、腐皮同火箭菜，全部都唔錯。牛肉燒飯團($88)，唔睇菜名，我會以為碟中嘅係章魚燒，哈哈。🍙飯團造型特別，外圍以肥牛包裹，而內裏就係壽司飯。飯團經燒過，所以散發住微微烤香，而且亦無整到乾晒。不過調味上同牛扒有啲似