魚台外賣壽司

Open Now

Now Closed

以前係附近返學，都會去呢間食壽司，貪佢平得黎又高質，扺過食爭鮮，質素可以同元氣媲美。而且店員服務態度好好又衛生。有時坐係吧枱位置，店員都會同顧客傾下計，離開嘅時候又會同你講拜拜，充滿人情味，今時今日仲點搵到呢啲咁好服務嘅小店。佢地嘅壽司選擇唔係好多，但每件出品都係即整，誠意十足。軍艦壽司塊紫菜唔會淋啤啤，佢地嘅炙燒三文魚壽司送到入口都仲有火燒嘅餘溫，配合細膩的油脂香，入口即融的滑溜感，真係味蕾嘅至高享受。偶然會同朋友share一份三文魚刺身，先至$7x，但大大份真係可以食到大滿足，每塊嘅油脂分布都好均勻，夠晒肥美。小店仲有啲小食都係好值得推介，炸物全部都係即叫即整，拎上手仲係熱辣辣㗎，冬天食嗰陣就感覺好幸福。我自己最鍾意食沙律，青瓜、沙律、蟹籽撈埋一齊，酸酸甜甜又幾清爽，夏天食就最match。未係openrice寫過食評，但呢間小店真係唔寫都覺得對唔住自己嘅良心。呢排疫情嚴重，成個行業都生意慘淡，希望佢地可以頂得住啦！