西關粥品 (Closed)

西關粥品真係好難食到，難得天黑前喺元朗，又係非繁忙時間，專登喺西鐵站行過去食，都要行10幾分鐘。嗌一個春菜陳腎咸豬骨粥先。其實佢嘅粥係有好多餸揀嘅，由呢啲經典款到蕃茄粥、粟米木耳呢啲比較少機會食到嘅都有。咁點解要食經典款呢？因為第一次黎，唔可以唔試招牌貨先嘅。簡直係一試愛上啦。粥底夠綿，又夠杰。豬骨大細適中容易食，又足料又夠咸。其實間舖頭係好多醬料嘅，菜甫都好似有兩款，但根本完全唔駛落任何野送粥。有冇野可以彈呢？有嘅，啲陳腎有輕微嘅腥味，但絕對係瑕不掩瑜。難得黎到，就算飽都要叫多樣野試嘅，本來好想試吓佢好出名嘅「煎」咸肉糭，但見隔離檯碟腸粉好靚，最後嗌咗個窩蛋碎牛腸，都好少見架。腸粉即叫即做，熱辣辣，啲皮薄到透到入面嘅餡料出黎，若隱若現，性感，好食，飽滿，豐富。有冇野可以彈呢？有嘅，隻窩蛋唔係好食得出。埋單先60蚊，非常滿足。