Futurus Gourmet (Closed)

上次去chicken n egg，途中發現呢間好有私房菜feel嘅野，專賣parma ham嘅，但有set dinner食，168起，感覺間野有好強嘅氣，話比我聽佢係好食嘅，一定要試下。然後喺超過35度嘅某一晚，由樂富站行到去佢門口，先發現我想食嘅牛扒係168+90再加一，長期糧尾黎講，真係有啲想走，但係實在太熱喇，都係入去豪多餐，結果，好彩入咗去。經過凍櫃位，原來入面別有洞天，梳化位超闊落好坐。最重要係，又係包場！一個客都冇！真係瞓喺度食都得。為咗平啲，2個人嗌咗一個牛扒set加一碟雞翼。雞翼食落似係烤焗做法，外面金黃色一點點，味道似係咸蛋黃整出黎嘅醬咁，但又唔太咸，算烤得幾好食。set dinner個湯不過不失，冇乜特別。之後上個頭盤係沙樂美腸多士，就幾驚喜，驚喜在舊麵包好鬆軟，配塊薄薄嘅腸片係恰到好處。但最驚喜嘅都係塊牛扒，餐牌寫出黎好似係安格斯，以1蚊1g黎講，佢份量真係有168+90咁大塊，肉汁真係豐富，肉味真係香濃，只係落咗少少粗鹽吊味，口感已經相當好。粗薯條亦都係水準之作，如果有埋啤酒送就完美喇，所以雖然間野好好坐，但食完之後都係好快埋咗單出去飲酒。