聯華茶餐廳

Open Now

Now Closed

由於工作嘅關係，阿K經常都要穿梭各區，所以佢會特別留意各區嘅特色食肆。前一陣子佢聽見我講「美都」食「焗骨飯」嘅經歷之後，佢同我講話响西環「正街」一帶發現咗一間舊式茶餐廳，「焗豬扒飯」都幾出名。既然呢期食得多焗飯，我諗不如就嚟一個小小地嘅焗飯巡禮，睇吓邊間餐廳能夠脫穎而出。是晚胃口不大好，所以我同阿K一齊食一客「焗豬扒飯」，我再加一杯熱奶茶。豬扒嘅份量都幾多，吉列皮仲未比焗汁整淋，仍維持香脆狀態；肉質本身鬆軟，但有點人工味道，我想可能係「梳打粉」作祟。老實講，香港有邊幾間茶餐廳唔用「梳打粉」整鬆肉扒呢？幾希矣！至於飯方面，水份嘅控制稍欠火喉，令到個飯偏濕同埋淋，我覺得乾身些少會好啲。奶茶滑但係唔夠茶香，唔駛問阿貴，一定係用「立頓」茶包去沖茶嘅。講到飲奶茶，我唔係「精」，而係「仙」(說笑而已)。一客「焗豬扒飯」三十六蚊，如果唔太計較嘅話，此焗飯可以滿足你嘅要求。