魂 (Moved) New Location

我與友人都好中意發掘香港地不同既拉麵舖，今次係鵝頸橋附近發現左 魂 ，清清地都幾好食，推介一下。魂 舖頭細細，不過都有四款拉麵，價錢都係公價，我地揀左太極同青龍。Menu有解釋湯底同材料，可以揀選麵嘅軟硬同湯底濃淡度，我就揀左硬同中，友人揀左雙中。青龍 $99菠菜汁加落豚骨湯做湯底，加上叉燒、玉子、蟹肉、魚子醬，非常特別。呢款拉麵係 魂 最特別嘅，每日六點後先有得食，每日限賣三十碗，所以要食到都唔係咁易。食落湯底真係幾濃菠菜味，會見到一粒粒嘅菠菜碎係入面，岀面幾難食到嘅一個味道。太極 $99墨魚汁加上豚骨湯底，一左一右，一黑一白，是為兩極。除左必有嘅叉燒玉子之外，仲有蟹膏同埋金箔。墨魚汁本身唔係一個非常濃味嘅醬汁，雖然我叫左濃味，湯底都唔會太濃清清地，有別於岀面濃到結身既豚骨湯。麵質係幼身款，掛湯一般，叫左硬都唔會太硬。有蟹膏嘅位置就會好味好多 叉燒半肥瘦都幾好食，入口未都即溶但係都溶到一半。食完同店主傾左陣計，原來銅鑼灣舖做到八月中，之後就會搬到太子，所有九月黎食嘅朋友就記得去太子舖啦！