新泰東南亞餐廳

Open Now

Now Closed

餐廳門面擺住一對大象擺設，充滿泰國風情，沿住樓梯落去正式進入餐廳，卡座全是梳化，甚有氣派。長長嘅menu 令人花多眼亂，款式多而且價格公道，幾經掙扎我哋終於點好菜。最吸睛嘅莫過於麵包焗咖喱軟殼蟹。幾隻脆卜卜嘅軟殼蟹腳浸喺咖喱入面，賣相極佳。咖喱混入蟹肉同蛋白，更加鮮甜。麵包點咖喱汁食又好玩又好食，不過因為裝住咖喱，麵包好快就變軟，要快手食呀！！我哋特意點咗客印度薄餅，唔浪費每一滴咖喱汁。呢度嘅印度薄餅係酥餅而唔係naan，比較有油香，即使吸咗汁都仲好脆。參荅炒通菜好香蝦米味，鹹香得嚟唔會太重味，不過可能人客多，溫度略嫌凍咗啲，但味道真係冇得彈。我哋亦叫咗唔少甜品試，小拼盤份量已經夠2-4人share。不過糕點類好似凝固唔夠，但味道就OK嘅。比較特別嘅係南瓜布丁，布丁蛋、奶味較重，偏甜，連埋軟糯南瓜一齊食軟笠笠咁，味道幾夾，不過布丁就唔太夠滑。呢個價位有咁好嘅service同環境，無論係人少少定成group人食飯都好適合。