明明車仔麵專門店 (軒尼詩道) (Moved) New Location

有時候諗唔到食乜，又想食啲野可以暖肚，我一般都會去食麵，今日介紹嘅呢間明明車仔麵，可以話係我每個星期都會光顧一次。雖然有時門口都會排一條小隊，但大概都係十五分鐘內入到坐。因為上餐速度頗快，所以都唔怕趕唔切番到公司。 車仔麵三餸嘅話都係HKD37蚊，個人覺得係灣仔區食午飯嘅平均消費價格上泥講，呢度都唔算特別貴。而且呢度食物水準表現整體上都非常穩定，所以都幾值得推薦。睇睇點單紙，其實選擇都幾多，所以光顧咁多次都試過唔少餸。如果同行有外藉人士，只要問侍應，呢度都可以提供英文點單紙咖。平時我最常都係柯打油麵，至於鐘意濃味嘅我湯底就會揀滷水汁，濃濃嘅滷水味，係叫餸時再劃埋咖哩魚蛋，增添幾分微辣，立刻味覺層次UP。 除咗湯底濃之餘，每次份量都十分足，絕對唔怕食唔飽！我推薦嘅車仔餸如下：韮菜餃、糖心滷蛋、豬紅、豬大腸、蠔皇花菇、柱候牛腩、蘿蔔、魚蛋，以上只係我嘅精選列。基本上都無食過唔好味嘅車仔餸，有待我繼續試勻佢整個MENU。總結，食物味道水準平穩，價錢唔貴且上菜速度快。真係我地呢啲快靚正打工仔午飯幾好嘅選擇之一！