百樂門煌宴 (Closed)

因今日接到電話知道細佬入左院，所以放工後成家去了醫院探佢，探完病後，因弟婦今日搞我細佬入院好攰，想快快回家，但又唔想煮飯。所以搭車去到火炭呢間酒樓快快脆食飯跟著佢趕返屋企瞓覺。其實我對呢間酒樓冇咩好感，因為上次媽咪在呢度擺生日酒時都遇過一個經理好不禮貌，但既然趕時間，就求其去呢度食啦。媽咪打開個餐牌好耐都揀唔到想食乜，後來由我發板求其揀幾樣餸快快食完返屋企便算。第一個係春菜黃豆排骨煲，春菜有點老，但好腍，排骨好大舊，但冇乜肉，個上湯味道都還可以。魚香茄子煲好香魚香味，個茄子份量好多。全煲都夠惹味，送飯一流！潮式煎蠔餅好大碟，好多蠔响入面，外面脆漿炸得好鬆脆好香口，入面蠔餅好香好夠味！沙巴龍躉蒸得好滑，好新鮮，好快被我們一口氣食晒。菠蘿咕嚕雞球冇咩特別，酸酸甜甜，不過不失。呢度既白飯用上砵仔蒸，份量啱啱好！飯後有甜品送，可揀紅豆沙或蕃薯糖水，我地就揀左蕃薯糖水，食落都幾重蕃薯同薑味，只係甜左少少！六個人連茶介加一大約食左六百蚊，在百樂門食飯，呢個價錢差唔多了。