沖繩二段料理 (大本型)

Open Now

Now Closed

呢日喺大本型返工，好日都唔過呢邊一次，真係唔知有乜好食，當然要OPENRICE下～因為唔想去food court同人逼，又得自己一個食，所以揀左呢間裝修似露天CAFÉ，感覺坐得幾舒服既沖繩野未去過沖繩，風味正唔正宗就不予置評啦，但餐牌上既食物係幾新奇既，特別係呢個二段炊飯，感覺有啲似蒸汽石鍋。我去既時間係三點幾，所以有下午茶選擇，價錢唔算平但份量多。我揀左個檸檬蜜糖芥末豚肉芝士蕃茄炊飯($58)，定食包一杯餐飲。話明沖繩野一定唔少得黑糖，但黑糖檸茶檸水其實都係俾樽黑糖黎自己加，無咩特別主角既二段炊飯～～～芝士蕃茄炊飯湯底濃郁，蕃茄味濃，唔係茄膏溝水，飯粒索哂蕃茄湯既精華，綿綿地，夏天食起黎感覺無咁滯。面頭大大塊芝士，但湯唔夠熱，大部份都坐唔溶，勉強有拉絲效果，但同蕃茄味係夾既，塊蕃茄就偏生所以無食到。檸檬蜜糖芥末豚肉配菜有芽菜、秀珍菇同蕃薯，健康啲之餘加落飯度可以增加口感，但菇感覺唔算新鮮，有啲草腥味，蕃薯幾甜但得兩舊略嫌少左啲。豚肉大約有六舊，肥瘦適中，檸檬味唔出，主要都係食到蜜糖芥末既味，反而加左肉鬆有啲鹹鹹甜甜咁，味道幾夾幾驚喜。整體黎講如果想食得豐富飽肚啲又坐得舒服，係個唔錯既