英發茶冰廳

Open Now

Now Closed

最近面書非常之活躍一個群組叫做沙嗲牛肉關注組，長沙灣嗰間咁出名當然唔使我講啦。但係原來每一區都有啲出名嘅沙嗲牛肉店，觀塘區嘅代表竟然就係呢間咁懷舊80年代嘅茶餐廳。咁我就搵㗎膽粗粗去試吓。門口擺晒蛋撻菠蘿包，我諗佢廚房應該有自己焗爐焗麵包。晏晝四點去唔算多，適逢星期三跑馬日，店員同食客一齊刨馬經，樂也融融。我就叫咗佢個特餐，因為有沙嗲牛肉麵(此行嘅主要目的)下午茶想飲汽水，見到跟餐汽水唔使加錢咁就叫做汽水，點知杯汽水一啲氣都冇，好似糖水咁。忍唔住同夥計講話杯汽水冇乜氣，跟住個店員竟然同我講「係呀！跟餐嘅汽水係冇汽架」然後施施然走咗。算啦，我今次又唔係黎淨係飲佢杯汽水，不過提醒大家千祈唔好叫跟餐嘅汽水。佢嘅餐包同埋火腿蛋都係普通茶餐廳級數，比唔上澳牛。到真正食佢個牛肉麵，沙嗲尚算食到有沙嗲味不過冇花生味。麵質應該係一般即食麵。牛肉比一般嘅沙嗲牛肉切得厚，有咬口，但係又唔韌。可惜成碗面得3塊有D少。可能午餐時候食佢個沙嗲牛肉飯可能仲多的牛肉。結論：$36唔算貴，如果係想集郵或者食懷舊風味試過一次就夠，冇翻食嘅衝動，同埋千祈唔好叫汽水。