牧羊少年咖啡館 (香港文化博物館)

Open Now

Now Closed

最近入咗沙田區行吓，順便問吓朋友仔附近有咩好嘢食。朋友仔介紹咗呢間餐廳其實開業咗好耐，不過一直都未有時間去，咁啱今次就可以去試吓！今次我哋叫咗白咖喱豬扒藜麥香米飯配炒鬼佬雜菜，香草青醬雞肉蘆筍意大利粉，炙燒荷蘭汁豬肉扒，另外叫咗杯蘋果蜜桃先打奶茶同埋旭日。香草青醬雞肉蘆筍意大利粉嘅蘆筍勁大條！一入口食得出蘆筍有炸過，而且入邊好多汁面頭好鬆脆。不過青醬略嫌唔夠濃味，堅果嘅味道唔夠濃郁，不過勝在意粉入口好彈牙，雞肉都不過不失啦。白咖喱豬扒飯嘅白咖喱偏向泰式風味，香茅嘅味道比較突出，佢嘅豬扒全部都係厚切，入口啖啖肉，配上藜麥飯食令口感變得冇咁油膩。佢嘅蔬菜亦都有調味過，唔係一般嘅普通伴碟，節瓜入口都好爽脆我哋都好鍾意。炙燒荷蘭汁豬扒帶點芝士味，入口有少少酸酸地刺激食慾，會令到你唔小心一口接一口，不過因為我哋唔記得咗叫咗個豬扒飯，所以食食吓就有啲滯，不過我個人都好推介。飲品方面我覺得質素都唔錯，一入口覺得糖分唔高絕對係健康之選，咁佢來講我覺得呢間餐廳都唔錯 大家如果去城門河散步或者想要休閒嘅地方嘅話呢度都係一個唔錯嘅選擇。