冬蔭公公 (Closed)

路過連城未食午餐，一樓好多好野食，今日就揀左冬蔭公公， 貪佢夏日炎炎泰國嘢食就最開胃， 兩點開始岩岩好有下午茶餐， 比普通午餐平， 但來到份量都唔細喎， 叫咗個海南雞飯， 飯有淡淡薑味， 好香配黃油雞岩岩好， 醬料配有三款， 一款姜蓉， 一款泰式酸辣 同一款甜醬油， 我最buy佢中間個甜酸醬， 蒜蓉夠香， 又醒胃， 配埋個冬瓜湯消暑一流。個雞唔夠食，另外再叫咗個鳳爪， 超級推介， 鳳爪醃到好入味， 配埋香茅 同各種香料，甜甜酸酸 有少少辣， 又係一道夏日美食， 胃口大開， 唔經唔覺就比平時食多咗。仲有杯拉茶， 同港式奶茶唔同冇咁重茶澀味， 好香奶味 反而有少少似台式奶茶。另外再叫咗個串燒， 牛肉略嫌有啲硬， 雞肉就好嫩， 灑咗啲泰式香草， 好香，但個沙爹醬就偏甜，我比較鍾意就咁食唔點醬。仲有個木瓜沙律， 佢張菜單有兩個辣椒我仲以為好辣 ， 好在來到 都唔算辣， 青木瓜配埋d酸辣汁，拎嚟消食就啱好好。下次再嚟想試埋個冬陰功湯麵， 貌似唔怕太辣。