唐宮中餐廳

Open Now

Now Closed

今日中午Uncle同Auntie特意約咗我們飲中午茶提早預祝媽咪生日，我們當然係去返我們嘅老地方何文田九龍維景酒店嘅「唐宮中餐廳」啦！我們叫咗蟹籽賽螃蟹餃嘅餃皮都算薄身，質感好煙煙韌韌，至於餡料嘅味道就比較清淡！豉油皇海鮮炒腸粉炒得好夠鑊氣同好夠乾身，腸粉嘅質感好煙韌彈牙，味道啱啱好，唔會過鹹，而且表面輕輕煎香過，所以食落更加香口惹味！潮式蠔仔肉碎粥嘅蠔仔相當肥美，而且份量竟然比肉碎多，所以湯底嘅味道非常鮮甜，感覺都幾抵食！竹林上素甫嘅賣相唔係好吸引，因係用一塊大腐皮包著啲粟米、紅蘿蔔同其他雜菇等等等等⋯⋯本來以為呢個會係比較清淡，但由於有好大量嘅油份，食落成個口都係油，感覺超油膩同超失望！菠蘿鷄粒三文魚粒炒飯炒得好乾身同粒粒分明，鷄粒同三文魚粒係有輕輕煎過，所以食落都幾香口，再加埋清甜嘅菠蘿粒一齊食，感覺相當清新，而且唔會有好油膩嘅感覺！芝麻沙拉拾香骨嘅肉質非常鬆化軟滑，但沙拉醬嘅份量超級多，多到好似沙律醬湯浸拾香骨咁，所以感覺極之膩，呢點係令我們覺得相當失望！