權發小廚

Open Now

Now Closed

又係我兩餸飯試食專員出場喇😆今次想同大家介紹返位於彌敦道513號嘅權發（油麻地站C出口往太子方向步行約3分鐘）。價錢嚟講一定唔係最抵食，但以性價比計就唔錯，因為佢有🐟有🦐，甚至連炒蜆都有，真係四十幾蚊都可以食到個海鮮餐😋餸菜款式亦非常多，就算連炒蛋都用蠔仔炒，可見同其他兩餸飯比真係特別好多。我今晚揀咗糖醋骨同埋就試吓佢個蠔仔炒蛋。味道方面，先講糖醋骨，甜酸味合宜，醬汁收得剛好掛上骨頭，絕對係呢度三大首選之一（另外兩樣我會揀炒蜆同埋豉汁蒸🐟）。至於蠔仔炒蛋，蛋炒得唔太實，有汁得嚟又唔太散，唔太鹹，但唔好在蠔仔有少少腥味同食到少少蛋殼。我自己就另加5蚊配咗個例湯，今晚係菜乾豬骨湯，幾下火，天氣涼涼地飲，正！價錢方面，36蚊兩餸飯，45蚊三餸飯，冷熱飲品或湯另加5蚊。呢期另外仲有羊腩飯同羊腩煲，鍾意食羊嘅朋友，不妨試吓再報名食評俾大家知吧。