秋千.在 (Closed)

今日諗住同同事試下呢間新cafe，一早book左位，免得要等位，坐低睇完menu，眼見只得一位員工，仲要沖埋咖啡，不停揮手示意落單，唔知睇唔到定點，結果要行去水吧位叫佢，原來係要去cashier落order，仲要即時俾埋錢，勁奇怪，唔問都唔知，成間快餐店咁。店內大概有7至8張枱，我地12:41落完單，一直等一直等，等左好耐終於黎左一杯咖啡，中間見到廚房係逐碟逐碟咁上，連bagel都唔知點解要整好耐，仲要做完一枱先一枱。。。心諗... 我地咪有排？結果... 我個牛肋卷通粉係 13:30 先到！義式蕃茄醬慢煮牛肋卷心粉 - 牛肋條都煮得稔，都有五六舊，但我覺得個蕃茄醬就酸左d，overall不過不失。重點我地係只得1粒鐘既 lunch hour！中間係有問過仲要等幾耐，果位唯一員工一d唔好意思都無，只係答「整緊，要做完一枱先一枱。」其實如果人手唔夠，係咪要一早同個客講聲？難怪要收左錢先！再好食都假啦！我最後係要打包拎走，而我就用左成粒鐘 "好chill" 咁飲左杯 Flat White! 味道？我淨係知餓左一粒鐘，番到公司倒晒入口！