Video
Read full review
2014-03-03
150 views
城中出名嘅法國菜多不勝數，新加入一員就有La Saison，早前從雜誌得知，原來喺法國南部米芝蓮一星餐廳L'Etang du Moulin嘅法藉名廚Jacques Barnachon晌海外首家開設嘅餐廳，既然喺首家海外店，自然事事做得一絲不苟。有幸到嚟試菜，實在「法夢」就喺咁早，有緣品嚐星級名廚嘅手勢！餐廳位處金馬倫道The Cameron二樓，由專用電梯，以至踏入餐廳，環境裝潢、用餐氣氛，都甚具氣派，古典雅緻。一室淡紅襯淡綠斜紋地毡，湖水綠牆身配柚木，全店湖水藍或綠絨布靠背椅，加上柔和、昏黃嘅燈光，一切都帶著傳統高級法國菜餐館嘅風格。除咗大廳外，餐廳尾左旁有一個貴賓廂房，據介紹可以隔著玻璃睇到大廚們做菜，可惜當晚已有客人使用，未能一看；此外，仲有室外露天用餐區，以池畔綠草為題，感覺跟室內大廳截然不同，但同樣閒適幽靜，清涼嘅日子相信一定很受歡迎。Perrier (Lightly sparkling)經理先奉上嘅Perrier法國碳酸礦泉水，少汽清怡嘅礦泉水，可以幫助稍後品嚐各款菜式時清清味蕾，更讓人細心領略食材真味。開胃小品等候上頭盤期間，先有免費嘅三式開胃小品（Amuse Bouch
餐廳位處金馬倫道The Cameron二樓，由專用電梯，以至踏入餐廳，環境裝潢、用餐氣氛，都甚具氣派，古典雅緻。一室淡紅襯淡綠斜紋地毡，湖水綠牆身配柚木，全店湖水藍或綠絨布靠背椅，加上柔和、昏黃嘅燈光，一切都帶著傳統高級法國菜餐館嘅風格。除咗大廳外，餐廳尾左旁有一個貴賓廂房，據介紹可以隔著玻璃睇到大廚們做菜，可惜當晚已有客人使用，未能一看；此外，仲有室外露天用餐區，以池畔綠草為題，感覺跟室內大廳截然不同，但同樣閒適幽靜，清涼嘅日子相信一定很受歡迎。
Perrier (Lightly sparkling)經理先奉上嘅Perrier法國碳酸礦泉水，少汽清怡嘅礦泉水，可以幫助稍後品嚐各款菜式時清清味蕾，更讓人細心領略食材真味。
開胃小品等候上頭盤期間，先有免費嘅三式開胃小品（Amuse Bouche）喚醒一下嘴巴，據解釋，Amuse有使人開心，逗人快樂嘅意思，而Bouche即喺嘴巴之意，原來食法國菜，晌餐前梗有個食得精巧、食你唔飽嘅開胃菜，喺店子早早已準備好，佢又唔算前菜嚟，就好似上酒樓食中菜時，一坐低就擺低幾小碟酸菜、花生嘅小食咁，灣仔就有一間法國餐廳用上依個名字。3款餐前小食，做成一小份一小份，一啖一件嘅份量，的的骰骰，志在為嘴巴熱熱身。
- 三文魚撻（右）：撻皮以酥皮做，極為鬆化，三文魚蓉質感幼細；
- 蟹肉他他（中）：蟹肉他他好柔滑，蟹味突出，配上北海道魚子，多份清新感覺；
- 芝士泡芙（左）：以大廚家鄉Comde嘅芝士做，芝味柔和，而泡芙鬆軟。
品嚐都有先後次序，由淡到濃較為合宜，所以，應該由右至左咁食，即三文魚撻為先，較濃味嘅芝士泡芙為最後。
麵包籃滿以為開胃小品起咗個好開始，跟住嘅麵包籃只喺攝時間嘅間場，點知一樣細見廚師心思。麵包籃共有4款麵包，包括：迷你法式牛油小圓包（Mini brioche）、意大利蕃茄香草包（Tomato focaccia finger）、黑麥酸種小圓包（Rye sourdough roll）及法國百吉包（Baguette），配以原味法國牛油及灑咗海鹽嘅牛油。簡單嚟講，4款包都各具特色，口感、味道都無重複，所以，先話「細見廚師心思」。
其實，小弟一向都好鍾意食麵包，亦學過整包，所以，知道整包唔易。個人嚟講，法式牛油小圓包及意大利蕃茄香草包最得小弟歡心，前者非常鬆軟，極富牛油香味；而後者focaccia一向喺個人嘅心水包之一，雖然好香蕃茄香氣，反而食落又唔喺好重，但都無損對佢嘅鍾愛，因為配上海鹽牛油，加埋香草芳香，同樣好食。至於以天然酸種嚟發酵嘅黑麥小圓包，一如歐陸麵包，入口煙韌，兼且帶微酸，有個性。百吉包，容後再談，因為頭盤之一嘅鴨肝醬會重遇百吉包。
芫茜清湯啫喱伴柚子蝦他他Shrimp tartare marinated in Yuzu jus, consommé of vegetable jelly
依道前菜唔喺原先預定嘅前菜，喺大廚特別額外嘅「同場加映」，以雞尾酒小杯盛載嘅喺虎蝦他他，蝦肉十分鮮味，再簡單墊上利用蝦殼熬製嘅雜菜清湯啫喱，冰涼清新，好有趣嘅菜式。
由於試菜菜式一早已由店方擬定好，所以，都不用費神考慮點咩菜。分別預備咗兩道前菜、兩道主菜及一道甜品。店名法文「Saison」就喺解作季節，意思就喺會以季節性最優質時令食材入饌，務求做出嚟嘅菜式都喺質優味佳，更加入亞洲調味料嚟炮製部份新派菜式，希望客人有更多元化嘅體驗。
順帶一提服務方面，真喺不得不讚。專業、細心不在話下，例如：菜式與菜式之間，都會以小膠刮稍稍清理枱上剩餘物或殘渣；睇見麵包籃將近食完，會再問一問你有無需要加添；因為我哋喺共享菜式，除換碟外，輪到食主菜時，更將餐碟預熱，且先帶上白手襪才換碟，啲細節位可以話喺無可挑剔；而且經理都會詳細介紹每一道菜其用料及特色，上菜嘅速度又恰如其分，流暢順達，又見我哋對啲麵包名稱頗好奇，就索性打晒啲名俾我哋，真喺無諗過佢會咁有心！鯛魚伴日本柚子汁配魚子醬及海膽 $208
Sea bream tartare marinated in Yuzu jus, sea urchin and Aquitaine caviar
今晚正式嘅第一道前菜，雖然都喺他他菜式，但極盡唔同層次嘅海洋鮮味。以日本鯛魚做成嫩滑嘅他他，加上北海道綿柔嘅海膽及法國鹹鮮嘅魚子醬，本已可謂鮮味十足，層次豐富。加上別出心裁嘅醬汁，據介紹喺以香茅、青檸、檸檬、柚子等調製成醬汁，味道突出，感覺清新。
頂級原味及摩利菌鴨肝配烤吐司$268Duck foie gras terrine in two ways: one cook nature and one with morels mushrooms served with warm toast
第二道前菜「鴨肝凍批」，其實喺Jacques首本名菜之一，採用法國頂級品牌鴨肝，以慢煮烹調，兩件凍批，一個喺原味，另一個加入摩利菌，佐以蘋果芒果醬及黑椒海鹽，配以百吉包。將鴨肝醬搽晌百吉包之上，鴨肝醬甘香醇厚，入口柔軟，配蘋果芒果醬則多份清甜，而蘋果芒果醬帶有少少果肉，味道自然。百吉包切成薄片，又輕輕烘過，寧舍鬆脆。至於加入摩利菌嘅鴨肝醬，誇張少少講真喺菌香超脫，所以，小弟更鍾意後者！
試咗兩款前菜之後，對餘下兩款主菜就更期待喇。果然，有排場，有質素！淡水小龍蝦餃子配香菜蝦肉濃湯 $420
Langoustine ravioli in a basil and shrimp bouillon, perfumed with coriander
即場將香菜蝦肉濃湯倒進意式雲吞內，濃湯喺以龍蝦殼及蝦膏熬成，仲加入香茅、香草、八角……等香料，入口極濃鮮蝦味，又有香料芳香；而一客兩件意式小龍蝦雲吞，採用紐西蘭淡水小龍蝦，蝦肉頗爽口，雲吞外皮做得煙韌有咬口，富口感；而雲吞之上嘅原隻小龍蝦，介紹時說明處理上略有不同，但不知何解質感未如期望。
忌廉意大利寬條麵配黑松露 $358Creamy Tagliatelle pasta shared black truffles
送上枱喺一碟「白潺潺」嘅意大利寬條麵，即場鮮刨黑松露碎，再淋上加入黑松露醬煮過嘅忌廉汁，可想而知，菌香如何四溢！經理仲建議，最好立時將麵條撈勻，等熱力將新鮮黑松露嘅香氣逼出。確實，唔單啲寬條麵煮得咬口有嚼勁，忌廉汁幼滑，菌香馥郁，味道一流。
蜜餞鳳梨片配熱帶鮮果雪葩 $128Pineapple Carpaccio and exotic sorbet
甜品一樣有驚喜，以菠蘿為主題，喺兩款甜品嘅組合。左邊由下而上喺：蜜餞菠蘿薄片、菠蘿蓉黑芝麻脆蛋卷、香桃熱情果雪葩；右邊由下而上喺：酒香菠蘿蓉、曲奇金寶、白酒泡沫，再加一抹芒果醬及少少開心果仁碎做裝飾。兩者都帶出菠蘿嘅清甜及唔同嘅口感，雪葩又酸香清爽，金寶滿滿牛油香而鬆脆，認真口感豐富、層層疊疊。
法式小甜點最後添了一杯鮮奶咖啡Latte嚟配法式小甜點Petit four作為完美終結。小甜點有紅桑子馬卡龍、迷你金磚蛋糕Financiers及雜莓黑朱古力。馬卡龍小巧酸活，金磚蛋糕晌Eric Kayser已見識過，有杏仁及榛子香味，口感較濕潤，少少偏甜，亦喺預期，而黑朱古力好甘苦，朱古力味濃度高，味道悠長，又帶少少莓味。
今次都喺小弟正正式式品嚐「法國大餐」，無論環境佈置、食材用料、菜式創意、廚藝功夫、服務水準，都叫人大開眼界。始終都喺一餐高水準嘅法國大餐，付出相對哋要高啲，散叫當然比較無咁划算，但可考慮點7道菜嘅晚餐（$1,188 + 10%），已可以試到店方多款拿手招牌菜，作為慶祝特別日子或重要紀念日，確實喺一個上佳選擇。此外，若只為一嚐星級大師嘅味道，亦可以諗諗兩道菜（$328 + 10%）或三道菜（$368 + 10%）嘅午餐呢！
Post
