King's & Queen's 冰室 (Closed)

呢個疫情下，其實大家留家都好辛苦，小朋友日日留家都唔係辦法，我就上網睇下邊到有得比小朋友吸收下新鮮空氣，又比個位阿媽放鬆一下。終於選擇去到泥涌石灘行下吹吹風，放底一下口罩。我地係石灘行完，打算出返馬鞍山找野食時，竟然望過對面有間冰室喎，咁見餓餓地， 就行入去睇下有咩食。一座低打開餐牌食物選擇好多，我地就決定點幾款小菜和湯，慢慢嘆。沙拉豬扒 ~ 先炸好豬扒再加沙律醬炒，豬扒夠淋入味。豉椒炒蜆 ~ 蜆肉冇沙， 炒得夠鑊氣。西蘭花炒帶子 ~ 西蘭花剛熟唔錯。金沙鮮魷 ~ 有咸蛋配就已經好好味。黃金蝦球 ~ 蝦夠彈牙。金牌乳鴿王 ~ 大愛就咁揸住食， 老水味夠， 外皮炸得白脆。燒汁什菌牛柳 ~ 仔仔最愛，牛柳牛味濃加大量什菌用燒汁提味一流。杏汁白肺湯 ~ 估唔到個湯咁好味，奶白色的杏汁，仲要有娃娃菜係底， 豬肺又洗得夠乾淨，掂。食完呢餐太滿足了，仲要呢到的牆壁圖案好靚，岩哂打卡。 下次一定會再來的，因泥涌石灘唔多人，可以吸新鮮空氣，吸完再過來食野一流的行程呀！