泰屋

Open Now

Now Closed

自從政府對餐廳出咗新規矩之後，對於我呢個為食貓嚟講可以話好壞參半。好嘅就係食飯鬆動咗 ，唔好嘅就係難等位咗。今日就去咗旺角彌敦道728號嘅“泰屋“食泰國菜。 頭盤先嚟個冬陰功湯$88，酸酸辣辣最開胃，湯料有一隻大蝦開邊，蝦肉煲完湯都仲好爽口，加上有大量嘅草菇，有得飲有得食。然之後點咗一個青木瓜沙律 $78。同樣地酸酸甜甜，作為頭盤十分醒神，柚子肉十分飽滿多汁。 之後仲嗌咗個黃咖哩雞肉$82， 個人比較喜歡食黃咖哩，因為相對青，紅咖哩無咁辣， 攞嚟撈飯或者伴其他嘢食都好好味 。當我考慮叫油酥餅好定係蒜蓉包時，朋友決定食蒜蓉包 $36 ， 好彩個蒜蓉包都冇令我失望，一客四件熱辣辣脆卜卜，入口充斥住蒜蓉香香，點咖哩無得輸。主菜方面我哋嗌咗個蛋包金邊粉伴蝦 $88， 賣相一流 。好怕有啲地方嘅金邊粉做到好酸，但係呢個酸度啱啱好， 金邊粉炒得相對乾身， 所以口感都幾豐富。我就點咗杯龍眼冰 $33 少甜少冰， 杯底放滿龍眼肉 ，感覺十分滋潤。 值得一讚嘅就係餐廳跟足規矩，枱同枱之間有一定嘅距離 ，咁樣就算傾計都唔怕騷擾到其他食客， 食得安心又放心。