The Spice House Restaurant

Open Now

Now Closed

因為買左團購關係，我同朋友本身係網上訂位訂同一條街o既肉桂正宗印度餐廳，點知上到去唔知係裝修定係執笠，冇得食成肚氣，於是我同朋友近近地就黎左呢間泰式快餐廳，反正見佢門口寫明午餐都唔貴，都係四十蚊左右。入到去間餐廳，地方好細，每個位都坐得好迫，大部份食客都係食完就走，因為實在坐得唔舒服。我同朋友好快就揀左香葉肉碎飯同食咖喱魚柳飯，仲有杯凍龍眼特飲，我地兩個share個飯食，哈! 同一時間試晒二個餐。香葉肉碎相對辣，有肉碎伴飯都幾開胃，加埋咖喱汁，簡直絶配。咖喱味濃，唔辣，都幾香同重椰汁味，魚柳冇乜太大特別同驚喜，都算係正宗泰國咖喱，因為侍應個樣都似泰國人，但我地可以同佢地講廣東話。龍眼冰味唔係好濃，雖然比左幾粒龍眼，反而淨食龍眼仲好味。我地差唔多食完，我地先留意到有個老外食客，咁難揾的地方都比佢揾到，不過老外一d都唔似遊客，似係附近番工，證明都係好野。我同朋友話下次再黎試埋餐單另外二款午餐。