泰亭 (Closed)

第一次去泰亭食下午茶，估唔到又幾好食喎。下午茶餐多數$48，有啲餐再平啲收$38，我地叫左兩個餐食，結果味道幾好，仲有飲品送，我地要熱茉莉花茶。宜家外賣自取仲有九折，如果叫下午茶外賣嘅話就平上加平喇。串燒(雞、豬各2)拼青木瓜沙律$48- 呢個餐自由度高，串燒4串可以自由揀雞肉或豬肉，然後拼青木瓜沙律或酸辣無骨鳳爪。沙律我要少辣，木瓜絲酸酸甜甜，仲有好多車厘茄、花生粒同蝦米乾，好惹味仲充滿泰式風味。串燒剛剛燒好，熱辣辣，沙嗲醬入面有花生碎好香，我鍾意食串燒雞肉多過豬肉，因為肉質偏滑。不過食完有少少口乾，要飲翻多啲水。迷你青咖喱雞肉飯$48- 青咖喱汁好香，有椰漿同好多香料味，送飯食一流！雪藏雞肉粒都唔錯，青咖哩唔係好辣，我地將全部汁都撈白飯食唒，正！