泰象苑 (Closed)

今日又要全日跳舞，跳舞前要食飽啲，啱啱喺呢幾條街行過，諗諗下好耐都冇食泰國嘢，就係呢度食午餐。午餐有好多選擇，我而家好想食啲香口嘢，所以就嗌咗炒粉飯嘅呢個。 香草肉碎炒飯43蚊，有埋隻煎蛋煎蛋未係全熟，仲有蛋汁真係好送飯，香草肉碎嘅香草係好有泰國味，肉碎有啲肥，加咗紅辣椒去炒嘅味道係辣辣地幾惹味， 撈埋白飯嚟食，白飯都夠乾身，乜佢唔係叫炒飯咩？ 呢碟飯我點食都覺得係食泰國嘢，好彩冇中國餸嘅味道。跟餐飲品可以加8蚊改為泰式飲品，我想要飲青檸梳打，清涼下但係飲落好特別，唔似淨係得青檸加梳打水咁簡單，飲落似係加咗啲青檸汁咁囉！一個午餐真係食到好飽！