泰聚 (Moved) New Location

泰聚-同朋友「泰」好聚地方一講起食泰國野第一時間會諗起九龍城，唔係朋友帶路，我都唔知太子有間咁高質素既泰國餐廳。「泰聚」既裝修有別於其他泰國餐廳，全店以黑色為主，配上店主愛好既Bearbrick，唔打開餐牌真係估唔到係泰國餐廳。🐻原個西瓜沙冰 $58西瓜沙冰賣相非常吸引，絕對適合呃like用，西瓜沙冰非常好飲，可能因為天氣熱，差唔多枱枱都order一個，我緊係唔執輸。🐻泰式小食拼盤（小）$168由於我個人好為食樣樣都想試，所以就叫咗個小食拼盤。雖然叫既係細size，但份量一d都唔細，拼盤包括雞翼、蝦餅、魚餅、春卷同香葉包辣雞，全部即叫即整，上枱熱辣辣。我個人最鍾意食蝦餅，外層脆，肉質彈牙，配埋泰式辣醬勁惹味。🐻粉絲湯（肉碎）$88食完一輪熱氣野最岩就飲返碗湯，粉絲湯好足料，除咗大量娃娃菜外，仲有玉子豆腐、蘑菇、紅蘿蔔同芫荽，貌相雖然平凡，但超有內涵。🐻原個菠蘿鮮蝦雞肉炒飯 $108菠蘿炒飯分量十足，除咗蝦同雞肉外，仲有青口同魷魚，炒飯濕濕地，但好有𡁻口，菠蘿酸酸甜甜，加埋肉鬆同腰果，十分醒胃。🐻椰汁西米糕 $48椰汁西米糕層次分明，上層椰奶味香濃，下層味道較為清甜。