饗 車仔麵 (Closed)

一向好少食車仔麵，對評論車仔麵亦冇咩心得，不過儘管如此，試過深水埗嘅饗之後，我會話呢間嘅水準係好高嘅。呢度嘅車仔麵選擇較為簡單，分兩餸，三餸同四餸，後加每餸九蚊，所有餸劃一價錢，最啱我呢啲有選擇困難症嘅人。揀咗陳皮魚蛋，柱侯牛腩同醉饗蛋，當中最好食嘅係隻蛋，流心之餘，仲有陣陣酒香，超正👍；柱侯牛腩炆得既腍且入味，份量亦算多；魚蛋細細粒，陳皮味超濃，不過較為實心，並非我喜愛嘅口感。三餸加埋油麵同生菜，大大碗，好抵食，配搭腩汁，更增鮮味。