Notte (Closed)

星期六假期去左銅鑼灣食lunch，起OpenRice見到有好多好評所以就去試下，上到去餐廳我哋兩個人包左一間房，靜靜地可以談心，望住海景心情舒暢。是日餐湯係粟米湯配蘆筍同帶子，帶子個面有煎過好香口，湯裏面加咗好多配料都幾特別。日本頂級鮑魚伴醬油汁，前菜跟主食加$108，係冷盤黎既，有兩隻鮑魚好煙靭，同埋有醬油味，另外仲有兩片蘿蔔，仲有兩隻意大利雲吞超迷你，裏面係小龍蝦。香煎慢煮沖繩阿古豬配意大利白豆 $238，阿古豬煎得好香口，油脂均勻食得出豬嘅香味，好食。黑松露野菌意大利麵 $198，意大利麵係全蛋麵，有好多菇，切到細細粒，黑松露味好濃。招牌提拉米蘇配咖啡啫喱伴杏仁脆脆 $68，師傅即時淋上酒，有火焰效果！不過白天就睇得唔係好清楚。甜品好有層次，提拉米蘇既咖啡味好出，酒好重。分別要左個凍檸茶加$15同凍咖啡加$15，奶同糖漿另上，咖啡係即磨咖啡。唔會有人趕你走！好寫意的一個下午。