麵屋 元祖達摩 (Closed)

去之前，睇地址以為會好「隔涉」，但原來出咗太和站行唔夠10分鐘就到，心諗「唔…會唔會又係食租金㗎呢次…」去到坐底，環境ok不過食拉麵，最重要從來都係湯！然後係麵！再嚟係配料！見有期間限定嘅越谷海老拉麵，當然叫期間限定先啦。麵上到嚟，第一感係「嘩…會唔會豐富咗啲？」一來擔心佢圍唔圍到皮；二來擔心明明係海老拉麵，但呢碗麵入面食材種類咁多，味道會唔會好雜亂，甚至各自為政？不過，食完就知道係杞人憂天。同樣係以「海老」為題嘅拉麵，如果話某間大坑同旺角都有店嘅拉麵店嘅海老拉麵，係展現咗「純」呢個形容詞，咁達摩嘅呢碗越谷海老拉麵，所展現嘅就係「豐」——唔止係份量，而且感受到以蝦為首嘅味覺大軍，洶湧而不見雜亂咁，進擊而來。所以，我決定除咗碗之外，所有食得嘅，即使只係一滴湯，都唔會留返俾店家！