御の味 (Closed)

前幾日同朋友慶祝生日，梗係同佢食返餐好㗎啦！去咗灣仔搵高級日本餐廳，我哋嗰日太遲book位所以冇坐到吧枱，雖然冇得見到啲壽司師傅點樣整壽司，成個環境都好寧靜好舒服。我哋就嗌左一個二人餐，前菜係螺，食落去味道唔會好濃，好適合開胃。之後就梗係呢個主打嘅刺身啦，佢用咗秋葉來做主題，除咗有秋葉配搭之外成個顏色都配搭得好好。啲刺身食落去都好新鮮，非常之享受。之後當然有三貫壽司啦，壽司飯整得啱啱好，唔會好硬或者太軟，而且壽司都係暖暖地，米飯入邊嘅醋好入味。二人套餐入邊亦都有和牛，食落口真係有入口即溶嘅感覺，而且個醬調得好好味，雖然好濃但係又唔會好黏身嗰種。而且肉質脂肪比例分配得好好，唔會覺得好油膩。對我來講最有驚喜嘅就梗係佢呢個海膽蒸蛋啦！首先佢想嘅海膽好鮮甜，唔係好好苦嗰種。而且個蒸蛋蒸得啱啱好，入面好足料。而最後嘅晚餐當然附送左甜品啦，佢嘅紅豆雪糕食落去牛奶味好重，而且個梨都好甜！