蜀府川鍋 (Closed)

鯉魚門出名海鮮，呢間近水樓台嘅蜀府川鍋都主打海鮮，質素真係幾好！而且價錢真係好宜人，啱晒我哋！唔講幾錢住，先講個「蒸氣塔」有咩先！鮑魚啦、龍蝦啦、龍躉啦，仲有元貝、大蜆，淨係睇呢個派頭都唔少嘢啦！再加埋蒸雞、粥底，真係幾滿足架！咁多嘢一個人都係168蚊，真係幾吸引！仲要質素真係唔錯，隻龍蝦非常鮮甜，好新鮮！而且廚房好細心，一早已經爆咗隻鉗俾你，除咗蝦身大塊肉易食之外，隻鉗用少少力一搣就開，原隻食啖啖肉，正！至於另一個主角鮑魚，未煮前真係生猛到一個點，仲郁來郁去！所以你可以幻想到啲肉有幾清爽同清甜！不過都要提提呢度啲調味，元貝同龍蝦上枱時都有落少少蒜喺上面，俾你一齊蒸嘅。個份量都幾適中，唔會搶咗海鮮嘅原味，但又可以點綴一下，廚房係勁嘅。但係食完呢個塔撩起咗，有少少唔夠喉！所以再叫多個炒蜆，一樣好高汁！啲蜆無沙又大隻，啲肉好厚！而且調味都剛剛好，唔似有啲小炒鋪咁，似食炒豉椒多過炒蜆！份量就中規中矩啦，都有成20幾30隻架！下次如果去鯉魚門，唔駛落到底去搵食嘅，呢間近近哋地鐵站都好值得去下！