釜之魂釜飯專門店 (淘大商場) (Closed)

一直都聽有人介紹呢間日式餐廳，今次同朋友行開呢邊又咁岩唔洗排隊就入去試下。裝修好似去左日本咁，座位好寬敞，坐得好舒服。今次叫左一個釜飯，一個麵食同小食試試。▶️汁燒牛肉釜飯🐂本身以為會係好細碗，點知一上枱，份量十足，而且夠熱，啲牛肉好厚好有味，加埋燒汁好好食。糖心蛋有流心效果，而釜飯嘅飯有飯香，撈燒汁一流。▶️蕃茄牛肉湯稻庭湯烏冬🍜蕃茄湯帶小小辣，蕃茄味就唔算太足。用料同樣非常足，超大碗。烏冬煮得岩岩好，煙煙韌韌，索左少少湯汁唔會變一patpat，而且幾有味，但就有啲普通。▶️日式大阪燒不過不失，有勁多我鍾意嘅柴魚片同菜，不過就唔夠地道風味。▶️鹽燒鰻魚串燒只係叫左一串，鰻魚清甜爽口，鹽燒可以令我地食到鰻魚鮮味，而且唔會好油好漏，超想食多幾串，應該幾適合送酒。▶️榛子醬燒年糕榛子醬超邪惡，兩舊年糕都放左勁多榛子醬，一咬落去年糕外面脆脆地，入面好煙韌。年糕本身無味，加左榛子醬唔會太甜，中和返，係一個唔錯嘅小甜品。整體食物質素唔錯，價錢同份量都好合理，如果經過呢邊可以一試。