拾柒號冰室 (Closed)

星期日去買菜前，同太座去開餐，佢話想試下呢間新開的，就來了一試。話說藍灣廣場是殺戮戰場，幾年來留得番低的只有美心、麗晶同杏花樓，呢個舖位都轉了兩手。兩點幾，人不少。分吸煙及非吸煙區，壁壘分明，互不相干。剛好有卡位的客人埋單，我地可以立即有位坐。呢度裝修唔錯，卡位靠背幾高，坐進去好有私人空間，來飲杯野傾計都唔錯。對中、西餐都無興趣，所以都叫了紫菜四寶米線。四寶米線原本兩個都來錯了魚蛋拼墨丸，但在提點之下，年青侍應亦立即去換，對不起前對不起後的，服務態度都唔錯。紫菜四寶米線，吃落其實乏善可陳，米線太腍，魚蛋、墨丸同魚餃都是行貨，紫菜是搞笑的正方型包裝貨色。乳白色的湯底看似幾正，但渴過是如白開水般，沒什麼味道，唯一好處是味精應不會多。咖啡是即磨的，味道一般。埋單64蚊，唔平又唔貴，但論及食物質數，唔係咁抵。見隔離檯吃的鎮江骨同燒鴨賣相不差，不過就應不會再來的了。因為以附近食肆來說，吃茶餐廳可以去太興，想吃西式又可以去卡賽爾，吃粉麵還有華達。