Supreme Steak & Grill

Open Now

Now Closed

Supreme Steak & Grill係一間走平民路線嘅日系西餐，午餐全部幾十蚊有交易仲包埋汽水，好食之餘賣相亦靚仔，所以即使唔近港鐵站，但午市都一定坐滿人。餐廳走明亮簡潔路線，裝潢冇乜花巧，勝在地方乾淨企理，每張枱旁邊都有透明膠板相隔。三文魚明太子茶漬飯($80) - 白飯上面鋪滿蔥花、芝麻同堅魚碎，最吸睛當係係上面大大舊明太子。玄米茶係分開上，食之前先將茶倒入飯內。玄米茶沖開蔥花之後，下面嘅三文魚終於露出黎，食之前先攪勻明太子同芥末。因為加左明太子同芥末，茶漬飯清淡得黎多左啲鹹香味同芥末嘅微辣味，啱晒食滯左或者冇乜胃口嘅朋友。三文魚都算厚肉，份量都足夠，唔會太鞋。明太子意粉($60) - 每條意粉上面都掛滿明太子，醬汁唔會太多，唔怕食到好狼狽，意粉上面仲有流心蛋，流心效果出色。每個午餐都包一罐汽水或美式咖啡，亦可加錢轉其他野飲。Supreme嘅午餐只係比一般茶記貴少少，但食物賣相同味道已經有西餐廳質素，仲要唔洗加一，非常抵食。