佳芳廚房 (Moved) New Location

同朋友去深水埗睇電子影音產品，行行吓已經兩點半，繼續週圍行順便搵嘢食，行到汝州街見到一間叫佳芳廚房個名幾特別，招牌設計又靚就吸引入去，唔係一般茶餐廳，啲食物看似普通又有啲特別，下午茶餐有八種可供選擇。肉絲炒米粉配三隻湯餃，炒米粉好多配料，有肉絲、生菜、花生，炒得幾香味道唔錯。湯餃個湯底都幾濃郁跟生菜，餃子好滑溜，肉餡豐富有質感。全家福蒸餃，有韭菜鮮肉餃、粟米鮮肉餃、芫茜鮮肉餃、蓮藕鮮肉餃、雲耳馬蹄鮮肉餃、太子參椰菜雲耳鮮肉餃，我覺得呢個最正，一次可以食到6種口味嘅蒸餃，美味又滿足。鹽焗雞（例牌），朋友指定要雞胸，我都以為會好鞋口，又唔會喎，連雞胸都好軟熟，店長話係湛江雞所以雞味濃。香煎蘿蔔糕，煎香咗，蘿蔔一條條真材實料，蘿蔔糕都係自家製，食物實而不華，價錢實惠。