石之牛石板日式料理 (Closed)

平時出街食開嘅石燒牛價錢都唔平，今次喺深水埗搵到嘅呢間只需要$58就可以食到正宗嘅石燒牛，而且牛嘅部位選擇都好多，有牛小排、西冷甚至有和牛可以選擇，豐儉由人。除此之外，套餐跟嘅沙律、羅宋湯同白飯都可以任添任食，cp值幾高！今次食嘅係西冷套餐，除咗牛扒之外，仲會更粟米粒同埋薯條。牛扒上嚟嘅時候只有一成熟，依靠鐵板嘅熱力再去加熱到自己想食嘅熟度。牛扒牛味十足，尤其係油脂嘅部份非常之香口，只係因為鐵板真係好熱自己控制火候有啲難，最尾令到牛肉食落口感過熟，調味方面可以任攞自己想食嘅汁，有香蒜汁，黑椒汁等經典牛扒汁可供選擇。羅宋湯嘅味道有少少辣味，入面有椰菜紅蘿蔔紅椒等嘅配料，口感豐富。沙律菜可以係沙律吧到自己揀鍾意嘅沙律汁，芝麻醬嘅味道都幾香濃。店舖嘅環境油煙味有啲重，食完之後三會有比較重嘅油煙味，感覺空氣流通可以做得再好少少。但係勝在舖頭位置闊落坐得都幾舒服，有幾多卡位可以坐。