Lemongrass (Closed)

今日同朋友喺奧海城食飯，諗左好耐都唔知食咩好，最後朋友話想食泰國菜，搵到呢一間餐廳。裝修好清新，好舒服。見到門口大大個餐牌棟喺度，仲要好colourful，都feel到應該好多嘢食，同埋好吸引。果然真係無估錯，食物樣類多不勝數，甜品方面淨係睇相都已經流晒口水。仲有好多唔同款嘅飲品，都係$68/ 2杯。首先黎個炭燒豬燒肉，肉質鮮嫩爽口，炭燒香味亦足夠，燒得唔會太過乾身，依然能夠keep住肉汁嘅味道，仲可以加啲醬汁調下味添。泰式濕炒雞肉河：如果鍾意食濕炒嘅你就啱晒，芡汁絕對足夠。河粉炒得剛剛好，夠晒火喉。雞肉都好夠滑身。仲有栗米、青菜同荷蘭豆伴碟。馬拉盞炒通菜，次次食泰國菜都必點， 師傅手勢好好，啲菜唔會炒得太老，味道亦唔會太鹹，有馬拉盞調味，令到成碟菜都香氣四溢， 加上有少少辣椒更加惹味。食飽飽，本身想叫個熱情島甜品，有4大球雪糕，奈何太飽啦，所以只係一人叫左一球雪糕，滿足下口腹之欲啦。