時新漢堡飽 (Closed)

時新漢堡包，我細細個就已經聽過佢嘅大名，不過因為紅磡距離屋企好遠，所以由細到大都未食過。今日咁岩喺附近上完堂行去黃埔，就等我哋試吓港式漢堡包係咩滋味啦！入咗餐廳坐低之後，我哋叫咗兩個單層芝士蛋漢堡包，鮮炸洋蔥圈，滷水雞髀同滷水雞全翼。唔使十分鐘就出晒所有食物，呢度係自助形式嘅，自己攞食物同餐具，十分方便！餐廳電視機播住韓國電視台講反送中嘅新聞。漢堡包大大個熱辣辣，漢堡扒非常多肉汁仲要一啲都唔鞋口，相信落咗唔少肥肉去煎，加埋芝士同煎蛋成個口感豐富晒，不過食得漢堡包就唔好理啲卡路里喇，係咪？洋蔥圈係新鮮炸但一啲都唔油膩，香甜可口，點啲沙律醬一齊食可以減低熱氣嘅感覺。而滷水雞髀同滷水雞全翼就滷得好入味。時新漢堡包果然係香港人嘅漢堡包，下次再嚟黃埔呢區，一定要再食過！