賀喜 (雲疊花園商場) (Closed)

雲疊花園商場地下有兩間日式餐廳並排，分別係賀喜同豬屋，豬屋當時只有兩枱客，而呢間就8、9成滿，所以揀左較有人氣嘅賀喜。點左兩個set lunch。鰻魚飯餐都幾多人嗌，真係幾唔錯。鰻魚燒到剛剛好，唔會太燶太乾，口感軟綿綿，油脂均勻，醬汁濃淡度適中米飯唔夠黏糯飯香，蛋絲亦冇相入面咁多，稍為遜色。蒸蛋都幾香，入面有菇、蟹柳，稍微淡返些少會更好。麵豉湯咸左啲。另一個餐跟兩件招牌卷，果然係招牌，完全冇名不副實！反卷入面有玉子、蟹柳、牛油果，上面舊鰻魚非常香濃，再配搭秘製調味粉，味道極夾！主菜係泡菜三文魚頭鍋。實物同張相差距甚大，期望有落差。泡菜放喺鍋面，同鍋入面嘅味道完全冇關；三文魚頭原來係白烚的，魚頭骨果幾件啲肉一係就睲睲地一係就冇味，因為係烚唔係烤，魚骨魚皮林bat bat似肥膏，冇食到；什菜款都算多，冇咩特別。