古早味休閒台灣 (Closed)

尼間台式餐廳屬於樓上鋪位，樓下有售台式飲品，茶味濃厚。叫左紅燒豬軟骨麵($65)，lunch set跟小食3款，飲品，酥炸鹽酥雞(跟餐叫加$19)，柳丁窩夫配雪糕($56)。豬軟骨有4件，肉質軟冧，唔鞋口。配以紅蘿蔔，小棠菜，仲有微辣既湯底，湯底濃郁，深啡色既肉骨湯，惹味。而且，麵條軟硬適中，粗身麵條有口感。小食視乎每日安排，今日係黃瓜片，醃菜，春卷，開胃之餘，亦有小食食下。而跟餐優惠價既鹽酥雞，質素出奇既高，初初以為可能4至5粒，但係上枱時有8至9件，唔係一粒粒，除左炸皮薄之外，肉質滑而唔乾，一d都唔馬虎。跟餐飲品選擇左熱珍珠奶綠，唔駛加錢。珍珠沉低，份量超多，唔會煮得過熟，仍然有煙韌口感。而茶味非常突出。窩夫即叫即整，配上朱古力醬，加上冰凍雲呢拿雪糕。橙塊切走左白色既橙衣，所以食落易咬爛，而且甜，上面仲有士多啤梨添，甜品有賣相有味道。整體，價錢大眾化，而且lunch時間都可以散叫，所以任何時候想食咩款式都可以。服務亦好，食完會清走d碟，上菜速度亦快。