岱民兆禧店

Open Now

Now Closed

屯門兆禧食坊入面都有岱民嘅分店，同樣都係賣$25蚊嘅兩餸飯，性價比真係好高。而且同其他分店一樣，都係有接近20款左右嘅小菜供顧客選擇，炒菜、肉類一應俱全，而且份量足夠，加錢可配例湯或飲品。至於小菜款式我都唔想再多講喇，因為岱民全線嘅分店大部份都一定會有10～15款嘅小菜會恆常出現，例如煎肉餅、咕嚕肉、炸雞翼、炒菜心、炆豬手、粟米斑塊、椒鹽豬扒以及紅燒豆腐等等，間唔中會有滷水雞肶同臘腸供應。食物方面～煎肉餅厚身同好大塊，但稍為煎得有啲過咗火位，但咸香味好足夠，我食得出岱民嘅煎肉餅係有用到鹹魚茸混入去啲肉入面，所以有好香咸魚味，送飯真係一流！椒鹽豬扒都好惹味，但同我喺岱民其他嘅分店食到嘅椒鹽豬扒係唔一樣，因為兆禧店嘅椒鹽豬扒係有用到洋蔥同青葱，所以會更加香口，而且仲要有3件咁多(係長條形)，啖啖肉好好味，白飯正常，岱民出品水準長期保持穩定，非常可靠。