招點薈 (Closed)

今日做完瑜伽，過咗嚟柯士甸站，順便同朋友喺附近食完野先搭車返去。估唔到玉器市場附近竟然俾我搵到一間西式餐廳，緊係要入去一試！入到來感覺餐廳氣氛溫馨雅致，特別係格仔紋嘅枱布。因為疫情關係，餐廳員工先提供噴霧消毒雙手以及紙巾，俾我地裝除下既口罩，感覺衛生。餐牌有唔同類別，例如係set dinner, 冬日限定，前菜，主菜，甜品等等。我地叫左以下食物：忌廉湯配西多士忌廉湯口感香滑濃郁，配埋口感香脆嘅西多士食，簡直係最佳嘅配搭！意式香草蕃茄虎蝦意大利麵食得出好香嘅香草味，而且好鍾意佢嘅蕃茄醬汁！酸酸甜甜非常開胃。虎蝦十分大隻，口感彈牙。意大利麵硬度適中，份量都夠兩位食。忌廉汁香煎三文魚呢個香煎三文魚十分值得推介！廚師竟然可以將三文魚煎到外脆內滑。特別係魚皮，煎到好香口。雖然用煎既煮法，但係三文魚仲保留住魚油，配埋忌廉醬，不得了！另外配菜有薯仔，蘑菇，沙律，脆肉瓜等等，十分健康。凍百香果梳打賣相好吸引，飲落好香百香果嘅味道，梳打解渴一流！最特別嘅係，餐廳出面有一個open area, 可以比食客望吓風景。今晚比較凍，所以最後都係揀咗坐入面。下次過嚟，會試吓坐open area！