雅高·33

Open Now

Now Closed

餐廳位於荃灣市中心位置，附近有小巴站，巴士站，容易到達。未到12點嘅午餐時間，已經座無虛席，要等一陣先至可以入座。餐牌選擇唔少，套餐包括餐湯餐包，仲有餐飲，午餐仲免加一。雖然食客好多，但上菜時間唔需要等太耐，唔使驚餓親。餐包加熱至微暖，入面已經搽好牛油，入口軟熟。香煎紐西蘭肉眼牛扒（八成熟）配意粉，上枱時候有驚喜，估唔到午餐都咁有份量，咁大塊牛排，切開時冇半點血水流出，以為會煎得過熟啦，但原來唔係喎，中心帶點微紅，食落唔會過韌，仲覺得肉汁鎖住左，牛味唔錯，唔需要點蒜蓉汁都無問題。香草烤西冷羊扒配芥末醬，第一次食西冷羊扒，原來肉質係咁腍㗎，同平時食開嘅羊架肉質好唔同㗎，入口軟腍，無筋唔嚡口，非常好食。配菜嘅粗薯條，炸到脆卜卜，簡直食唔停口。另外追加左2個小食，炸蝦同焗蠔，非常滋味。焗蠔即叫即整，一夾起隻蠔，就知道肥美有肉汁，加埋芝士，洋蔥同煙肉一齊焗，味道更出色，推薦。餐飲嘅檸檬柚子蜜茶同雜果賓治都唔錯。呢餐午餐味道唔錯，價錢貼地，有機會可以再光顧。